Jüc Olimpics, descurí le logo de Milan-Cortina 2026

Kompatscher ala presentaziun dl logo di Jüc Olimpics de Milan-Cortina 2026. “Ince te Südtirol sará i Jüc tl respet dla sostenibilité”.

Incö (30 de merz) é gnü descurí le logo di Jüc Olimpics Milan-Cortina 2026, tratan na conferënzach stampa online a chëra che ince le presidënt dla Provinzia, Arno Kompatscher, á tut pert. “Le logo é gnü chirí fora da miliuns de porsones tres na lita online – á dit Kompatscher – y so design, scëmpl y tler, é espresciun dl spirit de chësta ediziun di Jüc Olimpics, che n’é nia chël dl bojëgn da se mostré sö, mo dla sostenibilité, en armonia cun la natöra.” Sciöche an sá, sarál le pröm iade che na disciplina di Jüc olimpics gnará tignida te Südtirol. Al se trata plü avisa dles cinch competiziuns de biathlon che gnará tignides tla Südtirol Arena da Antholz.

“Respetan le conzet de sostenibilité de Milan-Cortina 2026 – á injunté le presidënt dla Provinzia – unse a desposiziun na strotöra bele arjignada por de gran evënc, che n’á porchël nia debojëgn de gran intervënc mo ma de püces dortorades. Dilan ai fonds olimpics podunse ince completé na seria de infrastrotöres che miorará la mobilité de Puster y de döt Südtirol, nia ma por i Jüc Olimpics mo ince por le tëmp da dedô.” Ala conferënza stampa de presentaziun dl logo di Jüc Olimpics Milan-Cortina 2026 á tut pert ince le presidënt dl CONI, Giovanni Malagò, la secreteria de stat por le sport, Valentina Vezzali, l’aministradú de Milan-Cortina 2026, Vincenzo Novari, y i rapresentanc locai y dles cites interessá.