Soin a zimbar lånt!
Scritto da Red.azione il 8 Luglio 2022
’Z iz hoatar. Lusérn iz neméar azpe dise djar. I hån geflattart vil übar disan hümbl boda, azpe a plabez laila, geat abezodekha disan khlumman tòkko earde boda hatt hèrta geredet azpe biar! Epparùmmaz hatt hèrta khött “biar soin biar!” Un est? Saibarz neméar? Odar eppaz iz gebèkslt in ünsar khopf?
Balde pin gest djung i, da atz Lusérn ’z sachan vodar zung iz gest eppaz boda niamat hatt gelekk in diskussióng. “Ma hatt hèrta geredet asò!”, hatta hèrta khött dar Sèpp Tabàkka, “’Z izta nèt mengl auzolega kürs zo lirna azpe biar!” Un est, anvétze, dar Kulturinstitut, sidar a baila zait, lekk au hèrta kürs zo lirna in djungen ünsar zung. Ma umbrómm ditza? Umbrómm di eltarn, boda est håm ungefèr 40-50 djar, soin nèt gest guat genùmma zo traga vür ünsarna zung pinn khindarn?
Ma höart hèrta mearar lusérnar un lusérnaren boda, balsa soin sèmm zo reda fra de se rensa azpe biar, un balda pasàrt a pua, rensen zuar atz belesch.
