Ditza sichar umbrómm

Laise laise, odar furse kartza bahémme, di zaitn soin gebèkslt: balda di khüa, di èkhar un di sbemm soin neméar gest genùmma zo leba, arbat atz Lusérn iztarar nèt gest; di baibar håm gemocht åhevan “zo giana zo arbata” un propìo peng ditza vil famìldje soin gånt zo leba vort vo Lusérn… un ’z lånt in gestånt squàse ler.

Lai in di lestn djardar, di earstn von zboate djartausankh, di famìldje håm bidar ågiheft zo zornìra Lusérn, azpe soi lånt, azpe soi huamat.

Ditza sichar umbrómm est soinda pezzarne beng, bahémmegarne aute un sichar pezzarne zaitn vor di baibarn o; se håm bidar, azpe soine måmme un non, zornìrt z’stiana da, auzozügla di khindar.

Peng ditza, in di lest djardar soinda gebortet meararne plètz arbat gemacht squàse lai vor di baibarn, azpe di firma “Lant”, starch geböllt von Kamòu ’z djar 2008 von baibarn vor di baibar; dar CUP, un dar naüge khindargart boda haltet pittnåndar khlummane un gröaze khindar, intånto azta di måmme soin zo arbata.

Vor allz ditza o, in di lestn djardar soida bidar gebortet vil khindar atz Lusérn, un soin hèrta mearar di famìldje boda haltn gearn ünsar khlumma lånt.