Bi starch izta a saidenètz?

Biavl vert habar gisek a nètz gimacht vonan vèschomgesprünst voll pitt groaze sbere trupfan reng un håmaz givorst bia ’z tüanda sött dünne dretla auzohalta da sèll sbere? ’Z håmsen givorst di schientziètt o un soinda nå drauzoarbata sidar ettlane djar.

Di nètzan gimacht von vèschomgesprünstn soin gimacht vo zboa toal saide: ummana piglt un iz da sèll boda auhaltet di khlumman vichela bodada draurivan un d’åndar iz gimacht vonar spetzièll saide boda hoaz “dragline” (gespånntar drat) un boda iz asó zechat ke ’z mage haltn an drukh viar vert höachar baz dar stachl un iz o sèks vert ringar.

Dar profésor Pugno vodar universitét vo Tria vor a par djar hatt ågiheft durchzovüara an arbat z’sega bi starch ’z izta ditza saidenètz. Di arbat iz gibortet segante a vèschomgesprünst boda, nützante soi nètz, iz girift danìdar vonan rais, hatt ågihenk ’z haüsle vonan snèkk un hatt bidar ginütz soi nètz zo khear bidrùmm atz rais. ’Z vèschomgesprünst iz gånt nidar un au merarne vert un alle di vert hattz ågihenk a naügez nètz in haüsle, hèrta khürtzar baz daz sèll vorånahì. Asò, nützante soi sbere ’z vèschomgesprünst hattz dartånt åzospånna hèrta mearar dise dünne dretla un ziaga au ’z haüsle von snèkk finn bo ’z hatt giböllt, zo magaz nütazn azpe èst.