Radunanza del Istitut Cultural Ladin 2021
Scritto da Red.azione il 9 Dicembre 2021
En vender ai 17 de dezember – da les 5 da sera
Museo Ladin de Fascia, Sala Heilmann
L Istitut ladin l é vertech à zelebrèr sia Radunanza generèla del 2021, chiamèda ite dal Consei de Aministrazion adum co la Comiscion Culturèla per en vender ai 17 de dezember, da les 5 da sera, te Sala Heilmann del Museo Ladin de Fascia. Na ocajion per portèr dant la atività del an che l é do che l se sera su e per se baratèr idees e proponetes per l davegnir de chesta istituzion, majon de duc i fascegn.
N an desvalif, te chel che l é stat lurà n muie sui joegn e coi joegn, l é stat chierì l confront co la jent e i ujes é resté a spalanch per tor dant idees neves e desvalives. N an peà via con na empormetuda touta ite tel dit “Mia majon, mia storia, mia parlèda”. Te la Radunanza vegnarà prejentà i moments e i projec più significatives de chest an e contà vèlch neva per l an che vegn.
Ma la radunanza l é ence e soraldut l moment te chel che l’istituzion se confrontea co la comunanza, che la porta dant sia idees e proponetes, e belapontin a chest moment ge vegnarà dat lèrga particolèra.
A la fin del 2021 jirà fora ence la Comiscion Culturèla del ent e per chest n moment de rengraziament l ge vegnarà dedicà a chi che a colaborà con sie saer e sia gaissa a portèr a piz la ativitèdes del Istitut.
Per viventèr la scontrèda l Museo ladin arà l onor de tor dant doi scritores ladins de gran nonzech, che i à vent l prum e l secont pest del concors leterèr SCRIBO-Senior: Ivan Senoner, con sia publicazion: L Testamënt dl Lëuf, e Rut Bernardi, con Vites scutedes via, co la colaborazion de la Lia Autores Südtirol. Na ocajion ence per sotrissèr l’emportanza de tegnir e lurèr adum, anter valèdes ladines, istitutzions e lies, descheche perauter, fora per chest an 2021, l é stat fat con suzes e gaissa dai 3 Istituc ladins del Sela.
Sarà ence, bensegur, la prejentazion del Calandèr ladin 2022 col nef calandèr da ofize, che duc chi che tolarà pèrt a la Radunanza i ciaparà debant. L Istitut envia donca i fascegn a se binèr a la Radunanza anuèla e a tor pèrt al davegnir de sia majon, de sia storia e de sia parlèda.
Aldò de la desposizions Covid-19, se podarà tor pèrt a la scontrèda demò con zertificazion verda renforzèda. Vegn conseà de se enscinuèr dantfora.
