Öffentleschen arbatn

Bar soin drå zuarzogeba di arbat zo macha in prodjèkt zo auzzorichta di khesarn von Kostedjì, zoa zo macha an bicigrill, nützante ’z gèlt bodaz sa iz gest khent zuargètt vor ditza sa vor ettlane djar un boda nia iz gest khent genützt, hoffante az saibe no genumma, haltante kunt ke in dise lestn zaitn izta allz mèchte gekhreschart. Dena barpar asfaltàrn di beng in lånt un di parkplètz, un machan verte zo lega di tabéln un di rige danidar.
Darzuar billaz machan bizzan ke schiar sichar auz di lestn von summar/di earstn von herbest barta khemmen nidargelekk in lånt di fibra ottica zo haba internet bahémme.
Pittnåndar pinn Kamòu vo Pedemonte un pittar Provìntz vo Tria saibar drå z’sega bima mage pintn ’z Astetal pinn lånt pittnar kublpån, i bartaz khön bia ’z geat vür. Dar earst toal von arbatn zo vornaügra di nètz von
tum von trinkhbazzar izzese gemacht verte dòpo sovl djar un asó habar gemak åhevan di arbatn von zboate toal, pittar hilfe vodar gesellschaft AmAmbiente, augelekk vo mearare kamöündar vodar Valsugana un bobar drinn soin biar o.
Vor bazta ågeat di provintziàln beng, bille khön vorgèllz Gott dar provintziàl Djunta boda hatt inngeschribet in soin bilåntz schiar 9 mildjü euro herzorichta in bege von Las. Dar bege bart khemmen gebetart zoa azta mang pasàrn zboa aute pittnåndar. Darzuar bartnda khemmen gelekk naüge guardrail un gemacht mearar sichar sèmm boda soin di tòkkn mearar perikolosat, vor ditza bartz soin malamentar azma bart mang gian nidar un au sin azta nèt bartn soin verte di arbatn ombrómm, est azpe est, dar bege khint z’soina kartza eng. Asó vor mearare månat bartz soin eppaz malamentar un bartn mochan machan an lengarn bege zo giana nidar in tal, ma balda di arbatn bartn oin verte barpar håm an guatn bege, mearar sichar un boda mang machan alle. ’Z tüat ånt però seng ke, aftz disan prodjèkt boda sichar bart pezzarn di pintom zbisnen dar Hoachebene un ’z tal, di Pürgermaistarn vo Leve un Kalnètsch soin nèt d’akòrdo.
Dise arbatn mochan khemmen gemacht azma bill ke, saiz di pendlar, saiz di turistn mang håm an bege dèstar un sichar un ditza gitt zuar azta di laüt mang vürgian zo leba aftn pèrge.