A naügar pèrge

Vo hèrta dar pèrge khint gesek, vo berden nèt lebet, azpe a platz boma mage vennen di vrisch un in guat air pan summar un boda, pan bintar, gianda di laüt boda bölln raitn; ma dar pèrge iz, daz earst von alln, dar platz boda laüt azpe biar lem, arbatn un süachan zo haba a zukhunft; ’z iz nèt lai dar “spilgart” boda gloam zèrte “hearn”.

In di lestn zen djar dar pèrge, pan summar, hatt vorlórt hèrta mearar “hearn” boda håm zornìrt hèrta mearar ’z mer. Dar summar 2020, peng in Covid 19, hatt gemacht zornìr in pèrge in platz von mer. Dar pèrge khint gesek azpe a saubrar platz, a platz boda di luft iz guat un di laüt mang stian ummaz bait von åndar. Ma hettat gegloabet ke pan bintar dar pèrge, åna “impianti di risalita” hettat gesek zuarkhemmen khummane laüt; ’z iz nèt asó. Di laüt khemmen sobisó, ditza umbrómm in di stòrdja von lem von mentsch, alle di vert boda auzpricht a pèste, di laüt vonkìan von stattn. Ma mocht o khön ke di laüt boda arbatn attn turìsmus håmen gètt zo tüana zo voala “åndarz”.