Atz Lusérn di khindar soin hèrta gest gebónt zo stiana auz un in alt khindargart
Scritto da Red.azione il 8 Giugno 2021
Atz Lusérn di khindar soin hèrta gest gebónt zo stiana auz un in alt khindargart, sèmm boda est izta dar Kultùrinstitut, di khindar håm gehatt an gart o, zo lirna no vo khlumma zo arbata di earde, zo stiana tortemìtt dar natùr, propìo bia ’z iz gest ’z lem da atti pèrng.
Est anvétze, hèrta meararne khindar pasàrn di tang inngespèrrt, “umbrómm ’z iz khalt, umbrómm ’z izta dar bint”, furse umbrómm ’z iz dèstar o lengse vorå dar televisióng. In di lestn djardar di dökhtür von Beleschlånt håm ågeheft zo khöda hoatar ke di khindar mochan stian auz in air, in di beldar, in di bisan un inn in snea o; ’z iz genùmma lengse å gerècht, pitt barìtt un hångas un lazzanse springen: ditza iz daz peste bobar alle mang tüan vor ünsarne khindarn.
Auzzalt di khindar stian pezzar un khemmen sterchar umbrómm pittar khelte di batteri stèrm. Bar mang propìo khön ke stian auz iz da peste kura zoa nèt zo darkrånkha!
