I gedénkhmar

Haür bol hattz gesnibet! ’Z iztasan khent vor hèrta… ’Z soinz djardar bobar nèt håm a söllana dikha baiza un baita dekh, boda untar haltet allz.

I sauge auz pa vestar, ’z iz allz baiz … nåmp un bait, fin boda rivan moine oang…

I gedénkhmar, i bart håm gehatt zen djar, benn ’z hatt gesnibet pinne gestånt an ur o attavorå in vestar vo moinar khåmmar zo sauga snaim…

Vor mi iz gebest eppaz kartza schümma; ploaz gevrorate stèrndla boda soin gevallt abe tåntzante von hümbl.

Hintar moi haus, nåmp dar ånebitt soinda gest zboa muasésch un sèmm hånne gemak haltn a mint in ploazan vögela bodase soin postàrt z’èzza di pastùra.

’Z soinda khent di longarìn, di gèrle un di gardén un benn ’z iz gest vil khalt soinda sinamài girift di rüss, boda soin abekhent vodar Sibèrdja.

Balde pin gest khlumma hånne nèt gikhennt alle di nem von vögln, ’z hattmarze gelirnt spetar moi månn.