Bille roasan von pèrng

Atz ununzbuantzekh von lentz (martzo) iz dar earst tage von långez un di earde heft å auzzodarbékha! Haür dar bintar iz gest lång, di earde hatt gemak rastn gerècht untar a baiza un dikha dekh. Azma geat pa balt makma seng di earstn röasla boda spitzarn. Sa soin sèmm pitt soi khöpfle gekheart zuar dar sunn…sa pükhanse zuar diar zo grüazade.

Boda zorgéat dar lest snea iz voll pitt klökkla, sneaklökkla un bòkkln vo boinichtn. Pa Laitn, au pa khnottn, soinda sött schümmane pölstar vo hoadarn. Gianante vürsnen bartnda spitzarn di bisbòkkln asó pumblat un gel, di tutscharla un di bisan bartnse vülln pitt sempümmala un gele pipakån; ma di sèlln bomar givàlln daz meararste soinz di vergìzzmainicht pitt khlummane un liachte plabe röasla. Vorgèzzparaz nèt von faffan, groaz, hoach un roat un von schüzz bodase offetüan pinn schümma bèttar un spèrrnse balda khint dar reng.

Moi måmma gedenkhtze ke, in ta’ vo Corpus Domini, di diarndla boda håm gihatt givånkh di borìcht håm gihatt a zümmale voll pitt margarìttn un bòkkela un håmse auzgedjukht pa beng.