Por l’ocajiun oress l’Assessur provinzial ala Formaziun y Cultura ladina y l’Intendënta ales scores ladines Edith Ploner ti auguré n bun y bel laur a döt le monn dla scora: dirigënc y dirigëntes, insegnanc y insegnantes, maestri y maestres, scolari y scolares, personal aministratif, geniturs y families.

Por 1084 mituns y mitans, jogn y jones dles scores ladines dla Val Badia, y 1225 dles scores de Gherdëna, mët man ai 5 de setëmber n ann de scora nü. 635 é i pici scric ite tles scolines dles döes valades. Tles scores ladines, incumá, él indüt 2944 scolari y scolares.

https://www.youtube.com/watch?v=BZvhfO836mQ

https://www.youtube.com/watch?v=5IKysZrQP7o

Bela y aprijada la cornisc musicala pitada dala Scora de Musiga Badia, y dër aprijada ince la conduziun di trëi studënc Matthias Frenademetz, Lucia Pizzinini y Julian Costa.

Denant co stlü jö, él ciamó gnü saludé y rengrazié personalmënter les insegnantes y l’insegnant che vá en ponsiun cun incö: Rosmarie Bacher, Hanele Ploner , Verena Niederegger, Alessandra Zardo, Emanuela Wanker, Rita Konrater, Edith Trebo y Norbert Insam.

Dedô él sté na mësa torona cun rapresentanc desvalies dl monn dla scora: l’ispetur Albert Videsott, le diretur Heinz Videsott, l’insegnanta Monika Senoner, la rapresentanta dla consulta di geniturs Silvia Delago, le rapresentant dla consulta di studënc Martin Putzer. Al è gnü fora tler l’invit da ciaré inant cun crëta, da ti jí incuntra ai mudamënc dla scora zënza tëma, […]

Tl zënter dla manifestaziun él gnü metü l’intervënt dla prof. Concetta Tino, chëra che á baié de “Prepararsi al futuro: soft skills e didattica innovativa per fronteggiare le sfide della digitalizzazione e del cambiamento”. Na relaziun bindebo articolada, te chëra che al é gnü alzé fora la nezescité, da pert dla scora, da ti dé a […]

Ince l’intendënta ales scores ladines, Edith Ploner, á saludé i presënc y ti á dé inant zacotan de “parores clé” cun chëres che al foss da se dé jö tratan chësc ann de scora: individualisaziun, personalisaziun, chirí talënc y coraje.