Coronapass, la basa por de plü daurides
Scritto da Red.azione il 21 Maggio 2022
N valgönes dles daurides preodüdes dai 26 de aurí inant sará liades al Coronapass. Incö él gnü presenté i detais dl proiet che sará n stromënt important, mo an messará da se tigní inant ales regoles.
Pié indô ia en segurëza cun n numer de infeziuns bas por garantí le plü dî che ara vá les ativités liades ala restoraziun, ala cultura y al tëmp lëde. Chësc é preodü tl Südtirol dai 26 de aurí inant cun na pert de daurides liades al Coronapass. Al se trata de n proiet che, sciöche le presidënt Arno Komaptscher á sotligné tla conferëna stampa da incö, “á süa fondamënta sön trëi pilastri: porsones testades, porsones vazinades y porsones varides. I podun ciafé tres de plü libertés ma sce i sugn bugn da avëi zifres basses por ci che reverda la defujiun dl coronavirus.”
Co funzionëia pa le coronapass?
L’obietif dl funzionamënt dl Coronapass é gnü splighé dal diretur dl’Eurac Research, Stephan Ortner, che á recordé che al se trata de na sort de zertificaziun che vëgn dada ales porsones che á stlüt jö le percus de vazinaziun, che é varides dal coronavirus o che á da mostré sö n test negatif. Le vizeresponsabl dl Team Covid-19, Patrick Franzoni, á spezifiché can che le percurs de vazinaziun é stlüt jö ofizialmënter. Le zertificat de vazinaziun pó gní damané do söla plata internet vaccinazioneanticovid.it tla seziun informaziuns – zertificat de vazinaziun. Les porsones vëgn aratades sciöche varides do che ai á superé le Covid-19 te sis mëisc dala pröma atestaziun dla positivité: por le zertificat pón te chësc caje damané do tres na email a coronapass@sabes.it. Dai 5 de ma sará ince poscibl da ciafé le QR Code cun le simbol vërt.
Tesć nasai, antigenics y PCR
Le coronapass jará en funziun cun i tesć nasai y antigenics: chi che i fej ciafará spo dedô n sms cun la password por podëi lí n zertificat che an ciafa te na email. Tl zertificat sarál ince da odëi n QR Code. Sce le test é gnü fat tles ultimes 72 ores, spo röiun sön na plata che confermëia la validité. Chësc prozes é poscibl sce an fej le “scan” dl QR-Code. Cina ai 5 de ma él düc chi che fej n test PCR che pó se desciarié le zertificat sön papier tl’area Referti online dl’Aziënda sanitara, Implü pon le desciarié dal fascicul sanitar eletronich o damané le zertificat tres email a labmic@sabes.it o segreteriacovid@sabes.it. Dai 5 de ma inant ciafaran ince le QR-Code por i tesć PCR.
Apel da mët averda
Aladô dl assessur por la sanité Thomas Widmann é le coronapass “n vare por rové ala imunité de gran pert dla popolaziun. La tlé por arjunje chësc resultat é na gran cuantité de tesć, por archité la defujiun dl coronavirus”. Important él de chësc vers che düc se tëgnes ales regoles y mëtes averda, sciöche ince le diretur general dl’Aziënda sanitara Florian Zerzer á sotligné.”Les regoles da mët sö la maschera, da tigní les destanzes y de igiena resta sciöche denant”, á dit Zerzer.
Apel da fá para
Por che le Corona-Pass funzionëis él l’assessur por la proteziun zivila, Arnold Schuler, che á damané a düc da fá para. Da en lönesc ai 26 de aurí inant sará operatives indöt 80 staziuns de test te 69 Comuns dl Südtirol: dötes les informaziuns ciafon sön la plata internet www.provincia.bz.it/coronatest. “Chësc sistem é de valüta ince por le turism, deache ince i ghesć che gnará adalerch podará s’anuzé dl’oferta”, insciö Schuler.
