Dar earst aroplå
Scritto da Red.azione il 22 Luglio 2022
’Z iz ormài quàse a djar boda hatt ågeheft di pandemia von kråntzvirus un bobar mochan quindi quàse hèrta stian dahùam. I hån pensàrt att allz daz sèll bode pin gest gebónt zo tüana un daz sèll bode insorìr daz meararste iz sichar viazàrn. Asó hånnemar gevorst bia un benn ’z izta khent augemacht dar earst aroplå, boda fin haüt iz da peste un bahèmmegarste manìara zo mövrase afta gåntz bèlt.
Dar earst aroplå, boda gelàicht a migele in sèllnen boda soin haüt, iz khent augemacht von prüadar Wright ’z djar 1903. Disar prototipo vo aroplå hatt gehoast Flyer, ke in inglese billtz munen “dar sèll boda flattartˮ odar o “dar pilota von aroplåˮ, un iz khent gimacht flattarn in America.
