Di hennen bodrùmm atz Lusérn

Inar bòtta atz Lusérn ettlane famìldje håm gihaltet vichar un di meararstn håm gihatt hennen.

Est bidar, in dise lestn zaitn, haltnsase djunge spusan o.

Balde hån gihatt zen djar pinne hèrta gånt gearn nidar kadar Tetsch zo venna moi tånte Katìna, di sbestar vo moi nona Irma, umbrόmm si hatt gihatt di hennen, a sboi un a khatz o, boda iz hèrta gånt z’slava nåmp in heart.

Di vichar håmar hèrta givàllt.

Nidar kadar Tetsch iz gest schümma umbrόmm ’z lentle iz gest a migele bill…

Moi tånte hattmar zuargiredet azpe biar un asó hånne gilirnt vil vo ünsarna zung…

Daz peste iz gest benn si hatt augimacht in pastù vor ’z sboile un vor di henndla un håmsen gitrakk nidar in stall un di öala boda soin gest inn in èst, hattzemarse gimacht leng inn in a zümmale.

’Z hattmar givàllt umbrόmm nidar sèmm benn si hatt molàrt di hennen håmsa gimakk gian ummar bobràll bosa håm giböllt: pa bisan, in di èkhar un ummar pa beng o, umbrόmm ’z soinda pasàrt lai biane aute…

’Z soinda nètt gest lai di hennen vo moinar tånte Katìna ma di sèllnen vodar Laurétta vodar Bèrta, vodar Maria…