’Z iz gest auz pa höbiat
Scritto da Red.azione il 17 Luglio 2022
In aldar vrüa, benn ’z hatta gisunk dar hå, di Maria iz augistånt, hatt gèzzt an amblétt pittar marmelàda vo hennepern un gitrunkht an baizan kafé, dena izzese ågilekk: telàra, khopftuach un stivéln, hatt auginump in rukksakh, di zumma pittnan mezzarle un in stèkh un, no tunkhl, izze gånt in balt zo süacha sbemm.
In sèll mòrgas hattze gihatt in sint zo macha a långa khear: gian geràde in di Kòst, atti Markè, in Djau un khearn bidrùmm pa Kostesì, Bisele un Gaso. In a par plètzla hattze givuntet vil un schümmane brigàlde, si hatt augivüllt di zumma un in rukksakh o.
’Z iz gest auz pa höbiat (ludjo) un hatta ågiheft di “butàda”: asó hattze gehatt in sint zo giana alle tage un soi sbestar Frida berat gånt zo vorkhoavase attn merkà vo Tria. Asó, in tage darnå, di zboa sbestarn soin augistånt palle: ummana zo giana na sbemm un d’åndar zo vorkhoavase. Di Frida, pittn sèrlo voll, iz gånt zo vuaz zo Kalnètsch, sèmm hattze givånk in treno, argisotzt a Povo un nidar pa pontàrn fin attn merkà. Balse hatt gehatt vorkhoaft alle di brigàlde, hattze gekhoaft an sakh mel un, gidjukhtzar attn rukkn, izze gikheart bidrùmm in lånt.
