Azta di khindar höarn
Scritto da Red.azione il 24 Luglio 2022
’Z iz peng ditza ke vo groaz iz malaméntrar lirnen a naüga zung, ’z hirn iz neméar alenàrt vor ditza un nützt di sait atta tschenk, machante fadìge un seguitàrante zo konfrontàrase pittar gekhennatn zung, att d’åndar sait.
Ditza barntmaz pittar pronuncia odar pittar grammatica. Vor di khindar iz gåntz åndarst, se lirnen allz daz sèll bosa höarn ummar, intånto azza spiln odar azza lesan, singante an kantzù odar schaugante å di televisióng. Vor se iz nèt bichte ren hèrta djüst, odar spiegàrn di regln: di zung khint gelirnt nå un nå un steat inn in khopf von khinn fin balz detzìdart zo nützase.
Azta di khindar höarn vil zungen vo khumma di pronuncia vo dise zungen bart hèrta stian inn in hirn; asó mabar höarn laüt boda ren gerècht a naüga zung lai umbrómm sa håmse gehöart balsa soin gest khlumma. In ta’ vo haüt habar vil tecnologie un mang åhevan zo nützase gerècht vor ünsarne sünn o, machanten höarn meararne zungen, redanten zuar azpe biar un lesanten au vil libadar.
Ditza bol bart khemmen a guatz sachan vor se, vor üs un vor ünsar zung un kultùr o!
