Emtar un ågestèllte
Scritto da Red.azione il 25 Giugno 2022
Di earstn månat vo haür habar ågeheft a pizzle gezoget pinn sprentz, ombrómm, laidar, hatta abegètt si sèlbart di arbat di puachhaltaren Arianna Guadagni, boda hatt gehatt gearbatet gåntz garècht in bilåntz Åmt. In dise månat habar gesüacht a naügez mentsch zo måga åstèlln ma bar håm niamat gevuntet.
Vor daz sèll habar augelekk an öffentleschen konkórs åzostèlla a puachhaltar vor ungekhennata zait un vor antånto dar puachhaltar von Kulturinstitut Lusérn, dokt. Manuele Nicolussi Paolaz, bart arbatn an tage afte
boch in Kamòu zo geba a hånt. I khü vorgèllz Gott saiz in Dirèktor von Kulturinstitut, dokt. Willy Nicolussi Paolaz, saiz in Manuele sèlbart zo habasaz zuargètt. I gedenkh darzuar ke ’z izzaz nonet gest möglich aunemmen an sekretardjo vor in Kamòu, njånka vor halbezait vor 18 urn afte boch, ombrómm ’z izta nonet verte dar konkors vor sekretardje augelekk vodar autonome Provintz vo Tria un von Konsòrtzio von trentinar Kamöündar (haüt, 60 Kamöündar von Trentino soin åna sekretardjo).
Est azpe est iz njånka nemear möglich åstèlln an sekretardjo vor vollzait, ombrómm da pellare kamòu vüarom, balda iz gånt z’arbata in Provìntz di dok.en Marzia Capotosto, hatt abegètt disan ruòl. Antånto ’z djar 2019 izta khent gemacht a natzionàl gesetz, ågenump vodar Provìntz o, boda nèt zuargìtt zo maga zern mearar vor di laüt ågestèllt baz di zboa pellarn djar, 2018 un 2019. In dise djar ünsar kamòu iz gest drinn in “gestione associata dei servizi”, pittnåndar pitt Folgràit un Lavròu, un laidar hatt nèt gehatt in ruol vo sekretardjo vor vollzait, ma ma hatt lai gezalt an toal von sèll boma hatt gezert, schiar 23.000 euro atz djar, vor in sekretardjo von kamòu voranavür vo Folgràit vor in dianst vo sekretariàt.
Vor daz sèll barpar nemear mang håm in ünsar Kamòu an sekretardjo vor vollzait pitt 36 urn afte boch. I khü vorgèllz Gott in uantzegen zboa sekretardje bodaz håm gètt a hånt, di dok.en Maria Comite vodar Burge un dar dokt. Alberto Giabardo vo Rontschoi. Vorgèllz Gott khude in Pürgermaistarn von zboa Kamöündar bodasaz håm zuargelazzt o.
Atz 30 von abrèl habar auzgebèkslt in kamòu arbatar o, ombrómm dar Davide Zobele, i khü vorgèllz Gott imen o vor di arbat bodar hatt gemacht, hatt gevorst zo giana z’arbata vor di Provìntz bodar hatt an kontràtt vor vollzait un nèt lai vor 27 urn afte boch. Un da khüde vorgèllz Gott in naüge kamòu arbatar in Mirko Verones o. In madjo hatta sèlbart abegètt di arbat di khöchen von khindargart, Elsa Furlan, boda hatt gevintzart an konkórs in Valsugana, bar bartn aunemmen a naüga khöchen. Vorgèllz Gott irn o vor di arbat bose hatt vürgetrakk in alle dise djar.
