Se hatt nèt di vuas vo a vrau
Scritto da Red.azione il 15 Luglio 2022
Ats Lusérn, aspe alle bissan, di “Frau Perchtega” hüatet di sealn vo di khindar, ke no nèt soinda gebortet, in väsar voll pitt bassar in a höl. Benn in a schaüladar temporàl biar höarn rümbln, hoast ke di vrau Perchtega spüelt saine väsar.
Nèt alle bissan, ke affn pèrge Spil in Prånttal lebet di “Froperta”. Se hatt nèt di vuas vo a vrau, ma di vuas vo a goas un hüatet di sealn vo di khindar, ke no nèt soinda gebortet, in khesslar, ausgehölt in skaffan, voll pitt bassar, in an platz ke hoast “Kamer”. Dise khesslar soinda no haützotage.
Darzùar, obar Zoreri, a khlummas un mèchte alts lånt in di Laim, nidarnå hügl vo dar Keserle is no haützotage di höl, bo lebet di “Fraopèrta”. Nidarnå vo disa höl is an åndara höl, bo lebet dar “Fraostùm”, soin månn. In di höl vo di Fraopèrta is no haützotage an naschénte pèchle, benn s’renk.
