Di bèlt iz gebèkslt un asó Lusérn

Ja, epparùmmaz magat o khön ke di bèlt iz gebèkslt un asó Lusérn. Ma ditza iz eppaz boda bart schedegen ünsarn khindarn un magat vortdjukhan tausankh djardar vo identitét un vo kultùr.

Un gianante zo reda vo gèlt, a Lusérn åna zung hatt khumman futuro, åntzi! ’Z magat bidar gian untar Lavròu khemmante z’soina a fratzióng. Umbrómm azta fin est habar gehatt eppaz vodar Provìntz zoa zo giana vürsnen, iz lai umbrómm bar ren no azpe biar senónda, dal bång, berapar sa khent z’soina a fratzióng!

Khindar vo Lusérn! ’Z iz nèt genùmma vorstìan ünsar zung, ma mocht o ren azpe biar! Dei, ke dar sait guat alle! In eltarn un in djungen o, boda soin guat zo reda, billen khön: “Boaztar ke dar magatet soin di lestn zimbarn vo Lusérn, azzar geat vürsnen asó?! Redante hèrta atz belesch?!”

I böllat no höarn, azpe ’z iz hèrta gest, ren azpe biar. Ma mocht alle süachan zo reda pinn lusérnar. Lai asó di khindar mang vorstìan ke sa lem in a zimbar lånt.
Ke pò, njånka berate da zo schaffa in lusérnar zo reda in inglés!

I gea vürsnen zo flattra übar Lusérn, asó mage schaung å pezzar bazta bart vürkhemmen in ünsar lånt. Schauget bolàu eråndre!