Contribuc a bëgn dles mendranzes linguistiches

Aprovades dala Junta regionala döes deliberes che reverda la mendranza linguistica zimbra y la promoziun dl plurilinguism tles scolines ladines.

Tratan la sentada dla Junta regionala él gnü aprové dan da püch sön proposta dl assessur Manfred Vallazza, competënt por les mendranzes linguistiches, na delibera che renovëia l’adejiun dla Regiun Trentin-Südtirol ala Fondaziun “Dokumentatzionszentrum Lusérn” cun sënta a Lusérn tla Provinzia de Trënt. La soma aprovada dala Regiun é de 65.000 euro. Le renovamënt dla adejiun al Zënter é gnü aprové en conscidraziun dl’ativité de valorisaziun dla cultura, dl lingaz y dla comunité zimbra tres l’archirida, la conservaziun, la traduziun y la spartiziun dla documentaziun che reverda avenimënc de interes por Lusérn y les vjiinanzes. L’impëgn dla Fondaziun á sciöche fin chël dla promoziun dla conëscenza dl’ijola linguitica zimbra de Lusérn te n contest sides regional co ince nazional y internazional. Por arjunje chësc fin vëgnel organisé mostres, convëgns y incuntades cun esperc te de plü seturs dla storia y dla cultura.

Tla sentada á la Junta aprové sön proposta dl assessur Vallazza ince n proiet de plü agn de inrescida söl plurilinguism tles scolines ladines dl Südtirol. Le proiet á inom “MeLa – Scuola primaria studio di lungo periodo”. Do le suzes dl prö proiet MeLA (Mehrsprachig Ladinisch) realisé dal’Université de Desproch él sëgn gnü elaboré n stüde prelimiar por les scolines ladines che dess gní realisé dal’Intendënza y Cultura ladina dla Provinzia de Balsan cina l’ann 2023. Por la realisaziun dl proiet de trëi agn él gnü aprové dala Regiun 196.662 euro.