Löm vërda por l bonus por la cumpra de mesi digitai

Le “bonus-IT” por le personal dles scolines y dles scores é gnü confermé incö ai 2 de novëmber da pert dla Junta provinziala sön proposta di assessurs por la scora Daniel Alfreider, Philipp Achammer y Giuliano Vettorato. Te süa sentada edemala á la Junta ince stabilí i criters y les modalités por la cumpra de produc de hard- y/o software por rajiuns de insegnamënt y de didatica.

Al se trata de n contribut che gnará paié fora un n iade sciöche por la cumpra de hard- y software tratan la perioda dai 5 de merz dl 2020 cina ai 15 de novëmber dl 2021. Da öna na pert él la Junta che ó reconësce le gran laur fat da pert dl personal dles scolines y dles scores tratan la perioda dla pandemia, dal’atra pert él ince n sostëgn por la cumpra de produc de hard- y/o software tratan chësta perioda, sciöche al é gnü sotrissé dai trëi assessurs competënc.

Por l’assessur por la scora ladina Daniel Alfreider é le bonus IT n investimënt de reconescënza por le gran laur fat y chësc nia ma por le tëmp presënt mo ince por le dagní. “L’integraziun de mesi digitai tl insegnamënt y tla didatica é n gran arichimënt por les scolares y i scolars por le dagní ince por imparé competënzes digitales nöies”, sotlignëia Alfreider. Ince por l’assessur Achammer é le bonus IT n reconoscimënt dl laur fat ti ultims mëisc y agn. L’assessur Vettorato sotlignëia ince che chësta mosöra é na resposta ala sfidada dla digitalisaziun tles scores y scolines.