PNRR ont vernaiern de derver: u’ganommen de kandidatur va Palai en Bersntol

Pet de vourtschbinn van president Maurizio Fugatti de Provinzaljunta hòt u’ganommen de kandidatur va Palai en Bersntol ver en projekt zuazolt van PNRR asn vernaiern van derver. En de glaiche zait de junta hòt s rècht gem za vongen u’ za schaung abia za trong envire de doi òrbet ver za meing sa vourstelln en Minister va de kultur , ver za meing envire trong de vouròrbetn van PNRR “S schea’ van derver”. S gèlt vourtrong ist va zboa’sk milionen va euro ver òll Region oder autonome Provinz. S vonk asou u’ za kemmen aupaut der projekt vourklòfft en de voudern bochen, zòmm en de viar bersntoler gamoa’n, gahoasn “De kròft va de sprochminderhait: s bider augea’ van taitschn derver en sud van Alpn” ont petn zil za vernaiern s Bersntol.
“De vourtschbinnen as mòchen toal van doi groas projekt – derklort Fugatti – sai’ kemmen tschrim pet a groasa zòmmòrbet van òlla de provinzalnomtn (Kultur, Turismus, Lòntschòft, Digitalizazion, òllgamoa’orbetn ont Statistik), der bersntoler Kulturinstitut ont Trentino School of Management; òlls drautschauk van dinst van strategisce Mission zòmmòrbet van lokal dinstn, lòntpolitik ont van pèrng. Der zil – geat envire der president – ist za paun au an be ver za vernaiern s lònt va Palai en Bersntol ont s gònze Bersntol. Men vonk u’ petn bèrt gem en de identitet, s toalmòchen van a sprochminderhait. S doi ist der grunt va de inser trentinische autonomi, ont s bart sai’ de sòch as de beil draupaun a naia òrbet ver za gem bèrt ont vernaiern, s dorf va Palai en Bersntol as hòt schoa’ a sai’na gschicht. An projekt as guat ist za prauchen de bersntoer identitet en òlla de saitn. Nèt lai sèll as keart en de sproch, ober u’gahenk en de kultural tròchtn, en de virm as de hom se inngagrua’t en lònt, en de òrbetn abia s auzigln van vicher ont en de lòntschòft, ont nou en vernem va de umbèlt ont va de lòntschòft ont nou en zuariaven van lònt ver en turismus ont ver de òrbetn van outdoor”.