Scola primera: chi che cëla di sculeies tla mensa unirà paià
Scritto da Red.azione il 23 Marzo 2022
Al personal nseniant ti uniràl recunesciù na ndenità straurdinera per cialé di sculeies ntan la paussa da marënda tla mensa.
Aldò dl articul 5 dl cuntrat culetif provinziel che vel al mumënt, ie l duvier de cialé di sculeies, di nsenianc, che fej chësc ntan si orar de lezion. Davia che chësc servisc tol for plu dl’aurela, pervia dl aumënt dl’ëures dla lezions domesdì, vën chësc tëmp tëut demez dala urganisazion dl program didatich. Ai 22 de merz à la Jonta, sun pruposta di assessëures cumpetënc, Philipp Achammer,Giuliano Vettorato y Daniel Alfreider, fat ora de garantì n paiamënt straurdiner per l personal scolastich che fej chësc servisc tla menses ntan la paussa da marënda.
“La priurità dl personal nseniant ntan l orar de scola – sotrissea Alfreider – muessa vester de viers dl nseniamënt, dl mparé y dla urganisazion dla lezions. L ne ie nia da pensé che n muesse tò ca posć de personal duzënt o ëures de nseniamënt, che n adrova per mëter a jì mesures de deferenziazion y ndividualisazion, per curì l tëmp de supervijion”.
Śën unirà chësc servisc de cialé di s tla mensa da pert dl personal scolastich paià sot forma de lëur straurdiner. La Jonta à fat ora de tò ca 2,5 milions de euro. Chësta soma unirà metuda a despusizion per l proscimo ann de scola 2022/23.
