Scoles ladines: cunfermedes la cater direzions raioneles
Scritto da Red.azione il 22 Aprile 2022
La Jonta provinziela à dat pro l plan de destribuzion teritoriela dla direzions raioneles de Gherdëina y dla Val Badia per i proscimi cin ani. Nsci uelen seguré la drëta grandëza dla direzions raioneles per pudëi inant garantì l’autonomia dla scoles, la stabilità dl sistem scolastich ladin y la puscibltà per i jëuni y la jëunes de arjonjer i fins furmatifs te n ambient adatà. Aldò di criters dla Jonta provinziela muessa uni direzion avëi almanco 300 sculeies y sculées y duta la direzions raioneles ladines à arjont chësta cumpëida.
“La cater direzions dla valedes ladines à fat n bon lëur ti ultimi ani y per garantì inant la stabilità y la cualità dl sistem dla scola ladina ons tëut la dezijion de cunfermé l plan atuel nce per i proscimi cin ani”, à dit l assessëur per la scola ladina Daniel Alfreider do che la Jonta provinziela à dat pro ai 12 de auril l plan teritoriel dla direzions dla valedes ladines per i cin ani che vën nchin l 2026/27.
Te Gherdëina iel nsci inant la direzion raionela de Sëlva cun la scoles elementeres de Sëlva y de S. Cristina y la scola mesana de Sëlva y la direzion raionela de Urtijëi cun la scoles elementeres de Urtijëi y de Runcadic y la scola mesana de Urtijëi. Tla Val Badia iel la direzion raionela de Badia cun la scoles elementeres de Corvara, La Ila, San Ciascian, San Linert y La Val y la scola mesana de La Ila y la direzion raionela de Al Plan cun la scoles elementeres de San Martin, Longiarù, Antermueia, Al Plan, La Pli y Rina y la scoles mesanes de San Martin y Al Plan. Ndut iel tla valedes ladines 15 scoles elementeres y 5 scoles mesanes cun bën 129 tlasses y 1800 sculeies y sculées (dac dl ann de scola 2021/22). Duta la scoles elementeres à arjont almanco la cumpëida minima de sculeies y sculées per pudëi resté daviertes.
“Uni direzion raionela à si identità y possa realisé si autonomia scolastica te n cheder normatif y respetan la ndicazions provinzieles”, dij la Intendënta Edith Ploner.
La delibra sun l plan teritoriel dla direzions raioneles dla valedes ladines ie unida data pro dala Jonta provinziela do la minonga positiva dla Sezion ladina dl Cunsëi scolastich provinziel y do la tëuta de posizion di ambolc dla valedes ladines che à duc sustenì l mantenimënt dla cater direzions raioneles.
