Un a sötta guatz sachan gibesen z’ èzza moin khindarn o

I pin hèrta gest a diarndle khlumma un magar, i hån nètt gèzzt vil un balde pin gånt zo venna moi tånte hattzemar gimèkket daz roat von öale, pitt viar löffela zükkar zoa zo ziagame au…

’Z iz gest guat un bia… Pitt sovl zükkar hattz parìrt ke ’z hevlt, un benn i hånz gihatt gèzzt gåntz hattzemar gètt no darnå a tökkle proat zo putza au girècht di kikkara… No est izzemarz asó gearn un gidenkhmar moi tånte Katìna.

Un a sötta guatz sachan gibesen z’ èzza moin khindarn o.

I gloabe ke daz peste un daz guat boma lebet un bodaz khint gelirnt vo khlumma, steat pitt üs vor hèrta.

’Z iz sa a par a djar bode hån in sint zo halta drai odar viar henndla un vert ,auz pan månat von prachant (sunjo), moi månn hatt ågeschafft in internet an ponéro pitt holtz. Benn dar iz gerift habaren gimocht vèrm gåntz zboa vért zoa azta nètt darvàult ’z holtz un dena habaren gilekk panåndar, un inn in èst habar gilekk gizàga un höbe, uminùm in haüsle habar gizoget an zou zoa zo molàra di hennen. Umbrόmm in ta’ vo haüt makmase neméar lazzan gian bosa bölln.

In månat von snitt (agόsto) saibar gånt nidar in an mül zo Kalnètsch un håm gikhoaft viar hennen, zboa sbartze un zboa roate.

Di roatn soin gest khlümmanar un håm gihatt an ledrenarn khåmp.

In dise månat soinsa gikreschart vil, in gåntz summar soinsa gånt zo graba bosa håm giböllt. Balsa håm ågiheft zo lazzase straichln håmsa gilekk daz earst öale.

Atz sibane von kristmånat (ditzémbre) inn in èst soinda gest viar öala.

’Z iz gest kartza schümma! ’Z giléba vonar bòtta kheart bodrùmm lai pittnar henn, zo gidenkhanaz hèrta ke daz peste vor ’z mentsch iz daz sèll boda khint vodar earde.

A henn iz a vich zo halta girècht, pitt daz sèll bose gitt anìaglan tage.