Dise djar izta
Scritto da Red.azione il 21 Luglio 2022
In ta’ vo haüt izta z’èzza alladarsòrt! Bar håmsan kartza vil o: geèzza boda khint vortgedjukht, ’z iz schade. Balma geat zo provédra boaztma neméar baz zo khoava: azma schauget boda soin di biskött izta zo leganen di hent in har: pitt odar åna zükkar, pitt tschokolàta, gimacht azpi a stèrndle, a hèrtzle, a röasle, pitt nüzzla, pitt marmelàda. Inar bòtta soinda gest di bratzièlln, hert un süaz, est soinda ploaz linne güatzla inngevült pitt allz. Un geabar nèt vürsnen pittar pasta, pinn ris, pinn öl.
Dise djar izta gebest biane z’èzza un di laüt soin gest arm.
Berda hatt gihatt a khua, a goaz, zboa hennen, a par konédje un a gertle, iz gest a hear, asó in soi haus soinda gest: milch, vlaisch, öala, patàtn, gele rebla, salàtt.
Berda hatt gihatt nicht hatt gehummart un håmen gerialt di trippn!
Ma hatt gèzzt: ris pitt milch, muas gimacht pitt milch, bazzar, smaltz, sürcha un boatzamel un saltz; supp pitt radìkkn; petarlång gimacht pitt patàtn, saltz, milch un vasöln; patàtana pult; kavrítz gimacht pitt lugånega, boatzamel, bazzar, saltz un fèffar; vröss un snèkkng; sürchana pult pitt kraut, köstla un skodegì; smòrm gimacht pitt boatzamel, pråmpoi, milch, baiz von öale, öl, saltz, smaltz un zükkar; kröftela pitt öpfln.
